Коронавирус жұққан тағы 24 науқас анықталды
Қазақстан денсаулық сақтау министрлігі 12 сәуір түнгі сағат 23:30-да 24 адамнан коронавирус табылғанын хабарлады. Алматы қаласында - 5, Алматы облысында - 9, Қызылорда облысында - 1, Түркістан облысында - 7, Нұр-Сұлтан қаласында 2 адамға вирус жұққан.
Қазақстанда жалпы науқастар 951 адамға жетті:
- Нұр-Сұлтан қаласы – 251
- Алматы қаласы – 165
- Қызылорда облысы – 118
- Ақмола облысы – 71
- Қарағанды облысы – 65
- Түркістан облысы – 43
- Солтүстік Қазақстан облысы – 25
- Ақтөбе облысы – 11
- Алматы облысы – 21
- Атырау облысы – 45
- Шығыс Қазақстан облысы – 6
- Жамбыл облысы – 46
- Шымкент қаласы – 38
- Батыс Қазақстан облысы – 9
- Қостанай облысы – 3
- Маңғыстау облысы – 10
- Павлодар облысы – 10
10 науқас қайтыс болған. Барлығы 99 адам айыққан.
Алматы облысы Еңбекшіқазақ ауданында бірнеше тұрғынның коронавирус жұқтырғаны анықталған соң, олар тұрып жатқан төрт ауыл (бұрынғы саяжайлар) - Алтын адам, Көксай, Алтын алма және Береке карантинге жабылды.
Қазақстан денсаулық сақтау министрлігінің хабарлауынша, COVID-19 диагнозы қойылған 11-науқаспен байланыста болған азаматтар ауруханаға жатқызылған болатын. Анализ қорытындысы 9 адамның вирус жұқтырғанын анықтаған.
Еңбекшіқазақ ауданы бас санитар дəрігерінің қаулысымен карантинге жабылған төрт ауылдың тұрғындарының тізімі жасалып, олар азық-түлік жəне қызмет түрлерімен қамтамасыз етіледі деп хабарлайды облыстық штаб.
Сәуірдің 13-іне Қазақстанда тағы он адамнан коронавирус анықталғаны туралы ақпарат тарады.
Денсаулық сақтау министрлігінің мәліметінде Алматыда - жеті, Нұр-Сұлтанда - екі және Қызылорда облысында бір адамның вирус жұқтырғаны айтылған.
Қазақстанда наурыздың 13-інен бастап осы кезге дейін коронавирус инфекциясын жұқтырған 961 адам анықталған, 99 науқас дерттен айығып, 10 адам қайтыс болды.
Дүйсенбі, 13 сәуір күні Польшадан Қазақстанға гуманитарлық көмек жетті деп хабарлайды Қазақстан сыртқы істер министрлігі.
Арнайы ұшақпен жеткізілген жүкте көп мәрте қолданылатын 100 мың дана медициналық маска, сонымен бірге Польшаның князь Любомирский қоры Қазақстанда қашықтан білім алатын оқушыларға жіберген ноутбуктер бар.
17 наурыздан бері Қазақстанға АҚШ, БАӘ, Қытай, Оңтүстік Корея, Жапония мен Түркиядан гуманитарлық көмек жіберген.
Бұған дейін сыртқы істер министрлігі шет мемлекеттерден Қазақстанға гуманитарлық көмек көрсетуді сұраған болатын.
