Қазақстанда 4 адам коронавирустан жазылып шықты
Бұл ақпаратты 11 сәуірде түстен кейін coronavirus2020.kz сайты хабарлады. Нұр-Сұлтанда - 3, Қарағанды облысында 1 адам жазылған.
Барлығы 68 адам жазылған. Нұр-Сұлтанда - 34, Алматыда - 28, Павлодар облысында - 1, Солтүстік Қазақстан облысында - 1, Алматы облысында - 1, Жамбыл облысында -1, Ақтөбе облысында - 1, Қарағанды облысында - 1 адам жазылған. 10 адам қайтыс болған.
10 сәуірде денсаулық сақтау министрлігі Қазақстанда коронавирус жұққандардың шамамен 80 пайызының жағдайы жақсы екенін хабарлаған.
Қазақстанда 16 адам коронавирустан жазылды
11 сәуірде денсаулық сақтау министрлігі Қазақстанда 16 адамның жазылып шыққанын хабарлады. Нұр-Сұлтанда - 3, Қарағанды облысында - 1, Алматыда - 9, Жамбыл облысында - 2, Шымкентте 2 адам айыққан.
Жалпы республика бойынша 79 адам жазылған:
- Нұр-Сұлтанда - 34
- Алматыда - 37
- Павлодар облысында - 1
- Солтүстік Қазақстан облысында - 1
- Алматы облысында - 1
- Жамбыл облысында -3
- Ақтөбе облысында - 1
- Қарағанды облысында - 1
- Шымкентте - 2 адам.
Барлығы 859 адамнан коронавирус табылған. Эпидемия басталған уақыттан бері 10 адам қайтыс болған.
10 сәуірде кешке қарай денсаулық сақтау министрлігі Қазақстанда коронавирус жұққандардың шамамен 80 пайызының жағдайы жақсы екенін хабарлаған. 17 адамның жағдайы - ауыр, 107-інікі - орташа ауыр. Министрліктің айтуынша, кейбір аймақта эпидемияның жылдам таралуы байқалады.
Жұма күні президент Қасым-Жомарт Тоқаев эпидемияның шарықтау шегі алда екенін айтып, төтенше жағдай режимін 30 сәуірге дейін созған. Төтенше жағдай жөніндегі комиссия өкілдері дегенмен кейбір кәсіпорындардың жұмысқа оралатынын хабарлаған.
Алматыда "карантин ережесін бұзды" деп айыпталған белсенді Асхат Жексебаев қамалды
Тіркелмеген "Көше" партиясының мүшесі, белсенді Асхат Жексебаев "карантин ережесін бұзды" деп айыпталып, төрт күнге қамалды. Бұл туралы Vlast сайты жазды. Facebook-та жарияланған видеода алматылық белсенді жұма, 10 сәуірде ет алу үшін Магнумға барғанын, полицейлердің сол үшін оны ұстап, бөлімшеге апарғанын айтады.
Алматы қалалық полиция департаменті белсендінің Әкімшілік кодекстің 476-бабы бойынша ("карантин ережесін бұзу") әкімшілік жазаға тартылып, арнайы қабылдау мекемесінде отырғанын айтқан.
Ал Асхат Жексебаев полицейлердің ұстауын өзінің белсенділігімен байланыстырады. Бірнеше күн бұрын белсенді жергілікті шенеуніктердің бірінен қаладағы көлік кептелісіне байланысты сұхбат алуға тырысқаннан кейін полиция бөлімшесіне шақырылған.
Бұған дейін әлеуметтік желіде бірқатар белсенділердің, олардың арасында Асхат Жексебаев та бар, онлайн наразылық жасап, төтенше жағдай кезінде берілетін әлеуметтік көмекті кешіктірмей және күрделендірмей беруді талап еткен.
Асхат Жексебаев өткен жылдан бері саяси тұтқындарды босатуды талап етіп, жалғыз адамдық пикеттер өткізген. Осыған дейін бірнеше рет қамалып, әкімшілік жазаға тартылған.
Жамбыл облысында инфекционист дәрігер шағымынан соң аурухана басшылығы қызметінен кетті
Жамбыл облысында инфекционист дәрігер шағымынан соң аурухана басшылығы қызметінен кетті. Бұл туралы Жамбыл облысы әкімдігінің баспасөз қызметі хабарлады.
"Комиссия [Меркі] аудандық ауруханасы жұмысының, оның ішінде дәрігерлер Т.Ордабаева мен Қ.Төреқұлдың өтініштерінде көрсетілген фактілерді тексерді. Көптеген мәліметтер расталды. Ұжымда жағымсыз моральдық-психологиялық жағдай қалыптасқан. Оған бірінші кезекте емдеу мекемесі басшылығының кәсіби міндеттеріне жауапсыз қарағаны себеп болған. Сол себепті аурухананың бас дәрігері міндетін атқарушы, бас дәрігердің емдеу ісі жөніндегі орынбасары және бас есепші қызметінен босатылды" деді Жамбыл облысы әкімінің орынбасары Ержан Жылқыбаев.
Бұған дейін Жамбыл облысы Меркі аудандық емханасында коронавирус жұқтырған дәрігер Толқынай Ордабаева ауруханадағы жағдайға шағымданған болатын. Дәрігердің айтуынша, ауруханада маска мен қорғаныш киім жетпейді. Дәрігерлердің қауіпсіз жұмыс істеуіне жағдай жасалмаған.
Оқи отырыңыз: Коронавирус жұқтырған дәрігердің бастан кешкендері
Облыс әкімдігі өкілдері 11 сәуірде аудандық ауруханада жиналыс өткізіп, медициналық қызметкерлердің құқығын қорғау, оларды қорғаныш құралдарымен қамтамасыз ету мәселесіне ерекше мән берілетінін айтқан. Ұжымға жаңа бас дәрігер Райқұл Нұржановты таныстырған. Жамбыл облысы әкімінің орынбасары Ержан Жылқыбаев аурухана жағдайына шағымданған дәрігерлер Ордабаева мен Төреқұл заңсыз әрекеттерден қорықпаса да болады деп айтқан.
Соңғы мәлімет бойынша, Жамбыл облысында 46 адамнан коронавирус табылған. Қазақстанда барлығы 120-дан астам дәрігерге вирус жұққан.
Бұған дейін денсаулық сақтау министрлігі коронавируспен күресіп жатқан дәрігерлердің жалақысына 250-850 мың теңге аралығында үстеме ақы қосылатынын, кәсіби міндетін атқару кезінде коронавирус жұққан дәрігерлерге 2 млн теңге көлемінде сақтандыру төлемі берілетінін айтқан.