Украина ұлттық қауіпсіздік және қорғаныс кеңесінің жетекшісі Рустем Умеров бейбітшілік бойынша келіссөз кезінде Украина делегациясына жетекшілік етеді. 29 қарашада Украина президенті Владимир Зеленский сондай жарлыққа қол қойды.
Бір апта бұрын Украина президенті кеңсесінің жетекшісі Андрей Ермак делегация басшысы болып тағайындалған. Алайда жемқорлық дауынан кейін 28 қарашада Ермак отставкаға кетті. Зеленский делегацияға басқа адам жетекшілік ететінін айтқан.
Ермактан басқа делегация құрамы өзгерген жоқ. Оған өзгелермен бірге қорғаныс министрлігінің барлау басқармасының бастығы Кирилл Буданов, Украина қарулы күштерінің жетекшісі Андрей Гнатов, сыртқы барлау қызметінің жетекшісі Олег Иващенко және өзге де тұлғалар енген.
Умеров мамыр және маусым айында Стамбулда өткен Ресей өкілдерімен келіссөз кезінде де украин делегациясына жетекшілік еткен. Ал Ермак 23 қараша күнгі Женевада өткен АҚШ-пен бейбітшілік жоспарын талқылау бойынша келіссөзге басшылық жасаған.
Осы демалыс күндері АҚШ-тың Флорида штатында Америка-Украина келіссөзінің жаңа кезеңі өтеді. Оған АҚШ президентінің арнайы уәкілі Стив Уиткофф пен Трамптың күйеубаласы Джаред Кушнер де қатысады. Соңғы аталған екеу келесі аптада Мәскеуге аттанады. Bloomberg-тің жазуынша, Умеров пен Буданов, Украина сыртқы істер министрінің орынбасары Сергей Кислица АҚШ-қа ұшып кеткен.
Ақпаратқа қарағанда, бейбітшілік жоспарындағы ең күрделі бірнеше пункт әлі шешілмей қалған.