Қазақстанда коронавирус жұқтырғандар мыңнан асты
Қазақстан денсаулық сақтау министрлігі 13 сәуір 23.40-та елде 112 адамнан коронавирус табылғанын хабарлады. Олардың басым бөлігі Алматы қаласында – 99 адам. Қалғандары: Қарағанды облысында - 1 адам, Нұр-Сұлтан қаласында - 3 адам, Алматы облысында - 1 адам, Ақмола облысында - 2 адам, Батыс Қазақстан облысында - 2 адам, Түркістан облысында - 1 адам, Атырау облысында - 3 адам.
13 сәуірде Қазақстанда 140 адамнан вирус анықталды. Бұрын елде бір күнде мұнша адамнан вирус табылмаған. Осылайша, Қазақстанда вирус жұқтырғандар мыңнан асты - 1091.
138 адам дерттен айықты. 12 адам қайтыс болды. Вирус жұқтырғандар саны бойынша Алматы алдыңғы қатарға шықты.
- Алматы қаласы – 271
- Нұр-Сұлтан қаласы – 260
- Қызылорда облысы – 119
- Шымкент қаласы – 38
- Ақмола облысы – 73
- Ақтөбе облысы – 11
- Алматы облысы – 22
- Атырау облысы – 62
- Шығыс Қазақстан облысы – 8
- Жамбыл облысы – 46
- Батыс Қазақстан облысы – 11
- Қарағанды облысы – 77
- Қостанай облысы – 3
- Маңғыстау облысы – 10
- Павлодар облысы – 10
- Солтүстік Қазақстан облысы – 26
- Түркістан облысы – 44
Әзербайжанда коронавирус өршігелі оннан астам оппозициялық белсенді тұтқындалған. Құқық қорғаушылар билік "карантин ережесін бұзды" деген сылтаумен қарсыластарын жазалап жатыр деп санайды. Бұл туралы Eurasianet басылымы жазды.
Әзербайжан Халық майданы партиясының төрағасы Әли Керимлидің Facebook-тегі парақшасында жарияланған демократиялық күштер ұлттық кеңесінің мәлімдемесінде кемінде 16 оппозициялық белсендінің "репрессиялық саясат құрсауына түскені" айтылған. Ұйымның ақпараты бойынша он адам наурызда, тағы алтауы сәуірде тұтқындалған.
Коронавирусқа байланысты елде карантин режимі күшейтілген: тұрғындар үйден биліктен СМС арқылы рұқсат алып қана шыға алады. Әзербайжанда ресми түрде төтенше жағдай жарияланған жоқ.
Құқық қорғаушылар елде карантин талабын орындамады деген желеумен белсенділерді қудалау жиілегенін айтады. Бұл туралы Amnesty International мәлімдемесінде де айтылған.
Human Rights Watch құқық қорғау ұйымының Еуропа пен Орталық Азия бойынша бөлімшесінің директоры Гиорги Гогия Twitter-парақшасына "Әзербайжан билігі COVID-19 вирусымен күресті өзін сынаушылардың үнін өшіруге пайдалануды доғаруы тиіс" деп жазды.
13 сәуірдегі ресми мәлімет бойынша, Әзербайжанда 1098 адам коронавирус жұқтырған, 11 науқас қайтыс болып, 250 адам дерттен жазылған.
Қазақстанда коронавирустан тағы екі адам қайтыс болды
Нұр-Сұлтан мен Шымкентте коронавирус індентінен екі науқас көз жұмды. Бұл туралы 14 сәуірде Қазақстан денсаулық сақтау министрлігі хабарлады.
Осылайша елде COVID-19 вирусынан қайтыс болғандар саны 14 адамға жетті:
Нұр-Сұлтан қаласы - 2
Алматы қаласы - 2,
Шымкент - 2
Ақмола облысы - 4
Шығыс Қазақстан облысы - 1
Қарағанды облысы - 1
Павлодар облысы - 1
Түркістан облысы - 1.
14 сәуір, сағат 10:25-те жарияланған ресми мәлімет бойынша, Қазақстанда коронавирус жұқтырған 88 науқас анықталған. Алматыда 75 адамнан вирус белгісі табылған. Атырау облысы - 1, Нұр-Сұлтан - 4, Шымкент - 1, Қарағанды облысы - 1, Жамбыл облысы - 3, Түркістан облысы - 3.
Қазақстанда коронавирус 1179 адамға жұққан. 138 науқас дерттен айықты.
Франция мамырда карантин шараларын тоқтата бастайды
Францияда коронавирусқа байланысты енгізілген карантин шаралары 11 мамырдан біртіндеп тоқтай бастайды, бірақ жаппай көпшілік шаралары шілденің ортасына дейін өтпейді. Елдің шекарасы әзірше жабық тұрады. Бұл туралы Франция президенті Эммануэль Макронның коронавирус эпидемиясына байланысты ел азаматтарына жолдаған үшінші үндеуінде айтылған.
Макрон денсаулығына күмәнданатындардың барлығы коронавирус тестінен өте алатынын мәлімдеді. Францияның әр тұрғынына маска беріледі.
"Франция өзге де мемлекеттер секілді бұл эпидемияға дайын болмады" деп мойындады президент.
Сәуірдің 13-іне Францияда 4188 адамның COVID-19 жұқтырғаны (коронавирус жұқтырғандардың жалпы саны - 136 779) және 574 адам өлгені (індеттен өлгендердің жалпы саны - 14 967) анықталған.
